تنحت للدنيا كده
وفجأة لاقيتنى مسكون بالملل
لا عندى رغبة فى البكا
ولا فى الكلام
ولا عايز أنام
ولا حتى بسأل إيه ده.. ليه
وأخرتها إيه
وإيه العمل
وأخاف أقول لأى حد
أحسن يقوم يقلبها جد
حد صاحبى ينزعج
يمد إيده جوه قلبه
من باب الكرم
عشان يشاركنى الألم
أو يستلفلى من لئيم حبة أمل
حالة كده
ماعرفش إيه
ملهاش معاد
ساعات تزورنى ف الربيع
ف الحر
وف عز الشتا
وتجيب حاجات
لا فيها روح ولا ميته
حالة كده
ما عرفش إيه
لا معاها تنفع كلمتين
ولا غنوتين
ولا لقطة من ألبوم صور
ألاقى قلبى ف الهوا ويا الكور
أخاف أقول لأى حد
أحسن يقوم يقلبها جد
حالة كده
ماعرفش إيه
لكنى بطلع منها بعد السكات
فاهم شويه ف اللى فات
حاسس أوى
بحضن الصحاب
محظوظ أنا
ساعات أشاور
ينفتح لى ألف باب
لكنى برجع
وبغلط ف الحساب
وماعرفش ليه
تنّحت للدنيا كده
على سلامة
Posts
0 comments:
Post a Comment